Чацвёрты фестываль мабільнасці «Самаход» сабраў зацікаўленых у вандроўках людзей у Берасці 1 лютага. Прафесіяналы падзяліліся досведам працы ў travel-журналістыцы, заўзятыя вандроўцы далі карысныя парады пра танныя паездкі, а кампанія «Без візы» дадала аптымізму ў тэму візавага рэжыму Беларусі. Якія цікавыя парады атрымалі удзельнікі мерапрыемства — у артыкуле з фота ад Вольгі Малафеечавай для “Будзьма Беларусамі!”.
«Самаход» — фестываль для тых, хто цікавіцца вандроўкамі, месца, дзе можна «аддаць» ці прыняць каштоўную інфармацыю пра перамяшчэнні ў любыя пункты свету на любым відзе транспарту. Папярэднія мерапрыемствы ладзіліся ў Мінску, а ў гэтым годзе эстафету прыняло Берасце. Праграма была багатая на лекцыі і прэзентацыі і разлічаная на розныя ўзроўні вандроўцаў. Таму і аўдыторыя абнаўлялася ў пачатку кожнай новай тэмы.
Я вандрую і пішу
Падчас вандровак мы накопліваем досвед, уражанні, натхненне. Ёсць людзі, якім недастаткова перажыць гэта ўсё ўнутры сябе, яны адчуваюць неабходнасць данесці накопленае да грамадства. Вось яны і робяцца travel-журналістамі, задача якіх — адлюстраваць рэальную карціну ўмоваў адпачынку ў краіне.
Рэдактар парталу Traveling.by Анастасія Шаткевіч і журналіст Таццяна Данілушкіна пускаюць усе грошы на чарговую вандроўку, каб пасля падаць чытачам актуальную інфармацыю пра тое, куды, за які кошт, калі і чаму варта паехаць.
3 факты пра travel-журналістаў у Беларусі:
- Часцей за ўсё travel-журналісты вандруюць бясплатна (за кошт боку, які прымае) ці за мінімальны кошт. Але гэта не павінна ўплываць на ступень пазітыўнасці створанага артыкула.
- Апублікаваць нататкі пра свой адпачынак у Турцыі лепей у прыватным блогу. Рэдактар чакае актуальнай тэмы ці апісання краіны, дзе яшчэ не бываў ніводны беларус.
- Беларускаму travel-журналісту прасцей пісаць пра іншыя краіны, бо там ён госць. Але для паўнавартаснай карцінкі трэба выходзіць за межы стандартных экскурсій і шукаць кантакту з мясцовым насельніцтвам.
Я вандрую не па турпакеце
Турыстычныя фірмы існуюць, каб рабіць за нас усё. Нашая справа — заплаціць грошы і адпачываць. Але ёсць людзі, якія атрымліваюць задавальненне, пачынаючы ўжо з этапу планавання маршрута. Часцей за ўсё яны стараюцца «падсадзіць» на самастойныя танныя вандроўкі і іншых людзей.
4 парады для тых, хто шукае нестандартныя формы адпачынку:
- Пешыя вандроўкі (трэкінг) па гарах. Самымі папулярнымі маршрутамі для беларусаў сёння з’яўляюцца ўкраінскія Карпаты, польскія Татры і каўказскія горы ў Грузіі. Можна адправіцца ў горы самастойна, прадумваючы пытанні начлегу, харчавання і рыштунку. А можна далучыцца да прафесіяналаў (суполка «Паходнікі з Беларусі»). У любым выпадку варта пачынаць трэніроўкі з хадзьбы з заплечнікам на 15 кг.
- Вандроўкі на роварах. Варыянт для тых, хто ўжо адкатаў усе 4 роварныя маршруты па Белавежскай пушчы. Выехаць на ровары праз мяжу ў бок Еўропы стала амаль немагчыма, таму лепей зняць колы і скарыстацца цягніком ці аўтамабілем. Аляксей Ландрэс натхніў усіх уладальнікаў ровараў сваёй 100-дзённайвандроўкай па Еўропе. Але не спяшайцеся паўтараць ягоны маршрут, пакуль не выбралі адпаведную для вас мадэль ровара.
- Танныя пералёты. Самы хуткі спосаб трапіць у патрэбную краіну — самалёт. Дзякуючы танным авіябілетам (лоўкостам) можна істотна зменшыць свой турыстычны бюджэт. Сяржук Місюкевіч параіў берасцейцам карыстацца паслугамі сайтаў wizzair.com, ryanair.com, norwegian.com, easyjet.com. Тут можна замовіць танныя квіткі з польскіх аэрапортаў амаль у любое месца свету.
- Каўчсёрфінг (пошук бясплатнага начлегу). Дзякуючы анлайн-сэрвісу couchsurfing.com сёння вандроўцам неабавязкова замаўляць гатэлі і шукаць кампанію для паездкі. Дастаткова завесці акаўнт, прапісаць свае інтарэсы, а потым рассылаць запыты ў той горад, куды збіраецеся паехаць. Водгукі дапамогуць зразумець плюсы і мінусы канкрэтнага прытулку. Але памятайце, што і да вас можа звярнуцца замежны турыст, таму трэба прадумаць, зможаце вы прыняць яго ў сваім доме альбо проста пакажаце яму горад.
Я вандрую без візы
Актуальнай тэмай падчас планавання вандроўкі па-ранейшаму застаецца пытанне візы. Прэзентацыя грамадскай кампаніі «У Беларусь і Еўропу — БЕЗ ВІЗЫ!» выклікала вялікую цікавасць з боку аўдыторыі.
Сёння Беларусь — адзіная краіна сярод краін Усходняга партнёрства, жыхары якой плацяць за шэнгенскую візу 60 еўра (астатнія — 35 еўра). Гэта звязана з тым, што беларускі бок доўгі час не пачынаў працэс спрашчэння візавага рэжыму. Сайт Novisa.by размясціў цікавы калькулятар, які адлічваў дні, колькі Беларусь не адказвае на запрашэнне аб такіх перамовах. У выніку калькулятар спыніўся на лічбе 912 дзён.
7 «візавых» сакрэтаў для беларусаў:
- Сёння Беларусь мае бязвізавае пагадненне з 24 краінамі (сярод іх у асноўным краіны былога СССР і Паўднёвай Амерыкі).
- Беларусы ўжо маюць магчымасць знаходзіцца на тэрыторыі Турцыі без візы цягам 30 дзён. А хутка дасягальнымі для нас стануць Ізраіль і Бразілія.
- Максімальны тэрмін, на які можна атрымаць візу ў Беларусі, — 5 гадоў. Але на гэта рэдка каму шчасціць.
- Складаней за ўсё атрымаць візу ад амбасады Чэхіі. А самай закрытай краінай візавага рэжыму з’яўляецца Туркменістан.
- Бясплатную шэнгенскую візу атрымліваюць: дзеці ва ўзросце да 6 гадоў, грамадзяне, якія едуць наведаць цяжка хворага сваяка ці на месца пахавання, а таксама ўдзельнікі навуковых, спартовых, культурных мерапрыемстваў па запрашэнні адпаведнай арганізацыі.
- У студзені 2015 года ў 4 гарадах Беларусі (Мінск, Гародня, Гомель, Берасце) адчыніліся візавыя цэнтры Літвы. Усе неабходныя дакументы вам дапамогуць падрыхтаваць за 18 еўра.
- Польская амбасада ўжо распачала працэдуру выдання біяметрычных віз. Цяпер для атрымання шэнгенскай візы беларусам будуць рабіць адбіткі пальцаў. Біяметрычная інфармацыя будзе захоўвацца ў агульнай базе 5 гадоў і выкарыстоўвацца іншымі краінамі зоны Шэнген.
Паміж сур’ёзнымі лекцыямі ды размовамі арганізатары ладзілі «вандроўныя» віктарыны, дзе разыгралі карысныя для турыстаў рэчы. А завяршыўся фестываль мабільнасці «Самаход» музычным выступам саліста гурта «Без назвы» Алеся Лютыча.
Больш фота з мерапрыемства ад “Будзьма Беларусамі!” можна паглядзець тут.
Аўтар: Вольга Малафеечава