На чарговым паседжанні па пытанні Беларусі Рада ЕС па замежных справах падкрэсліў сваю гатоўнасць да спрашчэння візавага рэжыму паміж Беларуссю і краінамі Шэнгенскай прасторы.
Высновы Рады ЕС былі прынятыя 15 кастрычніка ў Люксембургу. ЕС яшчэ раз падкрэсліў сваё імкненне перайсці да перамоваў па пытаннях візавай фасілітацыі і рэадмісіі.
«На дадзеным этапе Рада […] вітае магчымасці пошуку шляхоў да далейшага зніжэння візавых збораў для грамадзян Беларусі», — гаворыцца ў высновах.
Таксама Рада Еўропы звяртае ўвагу на тое, што адпаведнае запрашэнне да перамоваў дасылалася кіраўніцтву Беларусі яшчэ ў чэрвені 2011 года. Адказу на яго няма дагэтуль. Між іншым, візавая лібералізацыя «можа паспрыяць міжчалавечым сувязям, што пойдзе на карысць усяму беларускаму грамадству».
Прадстаўнікі Рады падкрэсліваюць і тое, што ЕС вітае выкарыстанне дзяржавамі-чальцамі ЕC паслабленняў візавага рэжыму, прадугледжаныя Візавым кодэксам. У першую чаргу размова ідзе аб памяншэнні візавых збораў для пэўных катэгорый беларускіх грамадзян.
Аляксандра ПАРАХНЯ