Шэраг вядомых беларускіх арганізацый і даследчых інстытутаў аб’ядналі свае намаганні ў межах кампаніі “У Беларусь і Еўропу – БЕЗ ВІЗЫ!”. Пры падтрымцы партнёраў з краін Еўрапейскага Саюзу, беларусы збіраюцца адстойваць ідэю бязвізавага руху паміж Беларуссю і іншымі еўрапейскімі краінамі.
“Увогуле, дыялог з еўрапейскімі калегамі па аблягчэнні міжчалавечых кантактаў і разбурэнні штучных бар’ераў мусілі б пачаць улады Беларусі, аднак паколькі яны яўна не спяшаюцца, за гэта даводзіцца брацца грамадзянскай супольнасці. Будзем прыкладаць усе намаганні, каб падтрымаць гэтую амбіцыйную грамадскую ініцыятыву беларусаў”, – кажа Томас Тамілінас, прадстаўнік недзяржаўнай арганізацыі „Belarus Watch“, літоўскага партнёра кааліцыі.
Створаная кааліцыя мае адкрыты характар. Да яе могуць далучацца іншыя прадстаўнікі грамадскага сектару – як арганізацыі, так і асобныя зацікаўленыя асобы. Асноўнай задачай кааліцыі будзе ажыццяўленне грамадскай кампаніі “Без візы!” па прасоўванні аргументаў за скасаванне візавага рэжыму – інструмента, які кепска зарэкамендаваў сябе ў барацьбе з нелегальнай міграцыяй і арганізаванай злачыннасцю, а вось роднасныя, эканамічныя, культурныя, суполкавыя і іншыя кантакты абмяжоўвае вельмі паспяхова.
“Як перажытак часоў Халоднай вайны, візавы рэжым з’яўляецца асноўнай перашкодай для праеўрапейскіх настрояў беларусаў. Сітуацыю пагаршае бюракратычная працэдура падачы дакументаў на візу, а таксама непрыязнае стаўленне да людзей у консульствах”, – упэўнены палітычны аналітык Беларускага інстытуту стратэгічных даследаванняў Дзяніс Мельянцоў. Беларусь з’яўляецца ўдзельнікам праграмы ЕC “Усходняе партнёрства”. Ва ўстаноўчых дакументах праграмы як адна з патэнцыйных мэтаў супрацоўніцтва пазначанае дасягненне поўнага бязвізавага рэжыму.
Па дадатковую інфармацыю звяртайцеся:
Томас Тамілінас +37068627469
Дар’я Слабчанка +375291130908
Дзяніс Мельянцоў +375296268113
Беларускія партнёры кааліцыі
Aсамблея НДА
Беларускі інстытут стратэгічных даследаванняў (BISS)
Кансорцыум ЕўраБеларусь
Цэнтр прававой трансфармацыі
Рух “За Свабоду”
Наш Дом
Удзельнікі з Еўрапейскага Саюзу:
Belarus Watch (Літва)
Беларускі Дом правоў чалавека ў выгнанні ў Вільні (Літва)
“Офіс за дэмакратычныю Беларусь” (Бельгія)
Фундацыя Стэфана Баторыя (Польшча)
Трэці шлях (Эстонія)
Вольная Беларусь (Польшча)
Нягледзячы на палітычныя супярэчнасці паміж Мінскам і Бруселем, а таксама візавыя санкцыі, уведзеныя Еўрасаюзам супраць шэрагу беларускіх урадоўцаў ды візавыя санкцыі ў адказ з беларускага боку, ЕС не адмовіўся ад планаў у найбліжэйшы час распачаць перамовы аб спрашчэнні візавага рэжыму. Паводле апытанняў, магчымасць вольна вандраваць – асноўнае чаканне беларусаў у адносінах краіны з ЕC.
Новыя сябры кааліцыі
Нямецка-беларускае таварыства (Германія)
Belarus Watch