Кіраўніцтва кампаніі “Белавія” спадзяецца запоўніць свае паўпустыя самалёты турыстамі, якія любяць падарожнічаць, у сувязі з чым плануе знізіць кошт авіябілетаў пасля спрашчэння візавага рэжыму краін ЕС з Мінскам. Пра гэта распавёў намеснік генеральнага дырэктара кампаніі Ігар Чаргінец. “Са спрашчэннем візавага рэжыму паток пасажыраў павялічыцца ў некалькі разоў”, – лічыць ён.
“Чаму ў Літве патаннелі авіяпералёты? Таму што пасля ўступлення ў Еўрасаюз колькасць турыстаў павялічылася ўтрая. А ў нас праблема ў тым, што насельніцтва не так шмат, як, скажам, ва Украіне, а яшчэ і візы дарагія, каб дазволіць сабе часта падарожнічаць, таму самалёты паўпустыя, а страты трэба аплочваць”, – цытуе Ігара Чаргінца тэлеканал Белсат.
Сёння беларускія турфірмы часцей за ўсё прапаноўваюць сваім кліентам пералёты з Масквы ці Кіева. Як паведамілі ў кампаніі “Авестарс”, эканомія ў такім выпадку часам складае нават каля 200 даляраў. “Таксама добры варыянт – Коўна (Каўнас). Калі замовіць білет загадзя (за два месяцы), то да Берліну, напрыклад, ён можа каштаваць усяго 15 еўра”.
У той жа час кошт авіябілетаў з Мінску – мінімум 150 еўра. Але пералёты з Літвы могуць дазволіць толькі людзі, якія маюць візу. Зараз, калі літоўскі бок спрасціў працэдуру яе атрымання, кіраўніцтва “Белавіі” спадзяецца больш актыўна супрацоўнічаць з еўрапейскімі авіякампаніямі.